Mae Clybiau Gofal Plant Allysgol yn rhedeg cyn a/neu ar ôl y diwrnod ysgol a/neu drwy’r dydd yn ystod gwyliau’r ysgol. Maent yn darparu gofal plant fforddiadwy a hygyrch sydd o safon ar gyfer rhieni/gofalwyr sy’n gweithio neu’n hyfforddi. Maent yn darparu cyfleoedd chwarae pleserus i blant 3-14 oed. Byddai clwb ar ôl ysgol arferol yn rhedeg o ddiwedd y diwrnod ysgol tan 5:30yp neu 6yh. Mae’r plant yn cael cynnig byrbryd iach ac maent yn rhydd i ddewis o amrywiaeth o gyfleoedd chwarae. Maent yn parhau i fod yng ngofal staff cymwysedig nes iddynt gael eu casglu gan rieni/gofalwyr.

Mae clybiau yn:

• rhoi profiadau chwarae a hamdden gwerthfawr i blant a lleihau’r peryglon y gallent eu hwynebu heb ofal digonol;
• gwella sgiliau cymdeithasol plant a darparu cyfleoedd dysgu;
• rhoi cyfle i rieni fanteisio ar gyfleoedd hyfforddi neu addysg y maent eu heisiau, neu i gael swydd;
• cynorthwyo cyflogwyr i recriwtio a chadw staff;
• sicrhau cyflogwyr bod staff gyda phlant oed ysgol yn ddibynadwy ac yn ymroddedig

Fel arfer maent wedi’u lleoli mewn:

• Ysgolion
• Gweithleoedd
• Adeiladau cymunedol
• Canolfannau hamdden
• Neuaddau eglwys
• Meithrinfeydd dydd
• Canolfannau teuluoedd
• Clybiau ieuenctid

Mae’r Safonau Gofynnol Cenedlaethol yn nodi’r gofynion sylfaenol ar gyfer y safleoedd a ddefnyddir gan glybiau gofal plant. Mae angen ystyried iechyd a diogelwch a gofynion iechyd yr amgylchedd awdurdodau lleol hefyd. Os nad yw’r clwb yn cael ei redeg ar dir yr ysgol, yna mae’r plant yn aml yn cael eu hebrwng o’r ysgol i’r clwb. Mae’n werth cofio, os oes angen cludiant, bod costau’n cynyddu’n sylweddol. Mae hyd yn oed cerdded plant o un safle i’r llall weithiau’n golygu cyflogi staff ychwanegol at ddibenion diogelwch.

Weithiau gall unigolyn neu sawl unigolyn redeg y clwb fel busnes preifat e.e. masnachwr unigol neu bartneriaeth fusnes. Gall trawstoriad o’r gymuned neu ysgol sefydlu pwyllgor a ffurfio cwmni cyfyngedig trwy warant, elusen neu sefydliad corfforedig elusennol. Enwir grŵp o weithwyr sy’n rheoli clwb yn gwmni cydweithredol. Mae ysgolion weithiau’n rheoli Clybiau Gofal Plant Allysgol. Gall eich Swyddog Datblygu Busnes Gofal Plant eich helpu i benderfynu ar strwythur rheoli priodol.

Mae’n bosibl y gall Clybiau Plant Cymru Kids’ Clubs yn

eich cyfeirio a’ch helpu i gael cyllid i ddechrau eich clwb. Cysylltwch â ni am ragor o wybodaeth. Hefyd, gall rhieni sy’n gweithio fod yn gymwys i gael cymorth gyda chostau gofal plant fel y Cynnig Gofal Plant, Gofal Plant Di-dreth, Credyd Treth Gwaith, Credyd Treth Plant neu Gredyd Cynhwysol.

Yng Nghymru, mae mannau gwarchod plant a darpariaethau gofal dydd yn cael eu rheoleiddio gan Arolygiaeth Gofal Cymru (AGC). Os yw darpariaeth gofal plant yn rhedeg am fwy na 2 awr y dydd ar gyfer plant hyd at 12 oed, mae’n rhaid iddi, yn ôl y gyfraith, fod wedi’i chofrestru ag AGC. Mae AGC yn sicrhau bod gwasanaethau gofal yn bodloni’r safon y mae’r cyhoedd yn ei disgwyl drwy arolygiadau. Os ydych am agor am fwy na 2 awr y dydd, bydd angen i chi gysylltu ag AGC yn eich ardal chi i gofrestru. Bydd gan Clybiau Plant Cymru Kids’ Clubs y manylion cyswllt lleol a gall Swyddogion Datblygu Busnes Gofal Plant eich cefnogi drwy’r broses gofrestru.

Fel darparwr Gofal Plant Allysgol cofrestredig AGC byddwch yn:

Hyderus bod eich lleoliad yn bodloni’r Safonau Gofynnol Cenedlaethol ar gyfer Gofal Plant a Reoleiddir i blant hyd at 12 oed (sy’n nodi’r safonau gofal sylfaenol y dylai darparwyr cofrestredig eu darparu, gan anelu at ragori arnynt).

Cwrdd ag anghenion rhieni sy’n gweithio/hyfforddi trwy allu agor am dros 2 awr

Galluogi rhieni cymwys sy’n gweithio i gael mynediad at dalebau gofal plant, credydau treth neu gyrchu’r cynllun gofal plant di-dreth a gyflwynwyd yn 2016/17, sy’n cefnogi gofal plant fforddiadwy i deuluoedd sy’n gweithio;

Cefnogi’r cydbwysedd gwaith/bywyd cartref drwy roi tawelwch meddwl i deuluoedd, a thrwy hynny gefnogi ansawdd bywyd y plentyn

Cael cyfleoedd i gael cyllid drwy awdurdodau lleol (lle mae ar gael)

Mwynhau hyrwyddiad a chydnabyddiaeth am ddim trwy’r Gwasanaeth Gwybodaeth i Deuluoedd, sy’n rhannu gwybodaeth am ofal plant cofrestredig â rhieni sydd â diddordeb.