Mae’n bleser o’r mwyaf gennym rannu â chi rai cyfleoedd am ariannu. Peidiwch ag anghofio y gallwn eich cefnogi i gwblhau ceisiadau, felly cofiwch gysylltu os oes arnoch angen ein help!

Cronfa i Gymru

Mae’r Gronfa i Gymru yn gronfa waddol gymunedol genedlaethol, sy’n cael ei rheoli a’i hyrwyddo gan Sefydliad Cymunedol Cymru.

Mae’n rhaglen hyrwyddo dyngarwch a dyfarnu grantiau sy’n codi arian oddi wrth bobl a sefydliadau ledled Cymru, y DU, a thramor sydd am ‘roi yn ôl’ i gefnogi a chryfhau cymunedau lleol: mae Cronfa i Gymru yn cysylltu pobl sy’n rhoi sylw i achosion o bwys.

Cefnogir y gronfa ar hyn o bryd trwy bartneriaeth â Lotri Cod Post y Bobl.

Mae Cronfa i Gymru yn agored i elusennau cyfansoddiadol bach, lleol, cymunedol a sefydliadau gwirfoddol (e.e. cymdeithasau, mentrau cymdeithasol, Cwmnïau Buddiannau Cymunedol a chlybiau), gydag incwm blynyddol o lai na £100,000.

Deilliannau’r Gronfa:

• Gwella cyfleoedd pobl mewn bywyd,
• Adeiladu cymunedau cryfach,
• Gwella amgylcheddau gwledig a threfol,
• Annog pobl a chymunedau iachach a mwy egnïol, a
• Cadw treftadaeth a diwylliant.

Y Grantiau sydd ar gael

Mae grantiau rhwng £500 a £2,000 y flwyddyn am hyd at 3 blynedd ar gael i sefydliadau y mae eu ceisiadau yn cyflenwi orau yn erbyn y canlyniadau uchod.

Rydym yn bwriadu dyfarnu o leiaf chwe grant tair blynedd y flwyddyn.

Pwy all wneud cais?

Mae Cronfa i Gymru yn agored i elusennau cyfansoddiadol bach, lleol, cymunedol a sefydliadau gwirfoddol (e.e. cymdeithasau, mentrau cymdeithasol, Cwmnïau Budd Cymunedol a chlybiau), gydag incwm blynyddol o lai na £100,000 yn y flwyddyn ariannol ddiwethaf. Rydym yn croesawu ceisiadau gan sefydliadau nad ydynt erioed wedi derbyn cyllid o’r Gronfa hon o’r blaen.

Rhaid i chi fod yn un o’r canlynol:

• Grwpiau Cyfansoddiadol
• Elusennau Cofrestredig a Sefydliadau Corfforedig Elusennol
• Cwmnïau Cyfyngedig drwy Warant
• Cwmnïau Budd Cymunedol
• Mentrau Cymdeithasol

Grant Cymunedol Aviva

Adeiladu cymunedau cryfach, mwy gwydn ar draws y DU: dyna beth rydym yn ymdrechu tuag ato yn Aviva, a dyna sut y byddwn yn parhau i helpu elusennau bach ac achosion cymunedol.

Gwyddom mai’r achosion sy’n cael yr effaith fwyaf yw’r rhai sy’n cael y cyfle i brofi syniadau arloesol ac archwilio strategaethau cynaliadwy newydd heb ofni risg. Dyna pam mae Cronfa Gymunedol Aviva yn cefnogi’r syniadau clyfar sy’n symud cymunedau ymlaen ac yn rhoi cymorth ac adnoddau hanfodol i’r achosion anhygoel hyn.

Bydd Aviva yn rhoi arian cyfatebol i bob rhodd a gewch hyd at £250. Mae hyn yn golygu os bydd rhywun yn rhoi £5, byddwn yn ei ddyblu i £10. Os ydyn nhw’n rhoi £250, byddwn ni’n cyfateb iddo, felly mae’r achos yn cael £500. Gall sefydliadau dderbyn hyd at £50,000 mewn arian cyfatebol a gall achosion cymwys wneud cais unrhyw bryd.

Oes gennych chi syniad a fydd yn symud eich cymuned ymlaen? Rydym yma yn gefn i chi.

Cronfa Gymunedol Asda

Mae Grymuso Cymunedau Lleol yn un o’n Grantiau Llawr Gwlad, sy’n ariannu hyd at £2,000 i alluogi grwpiau cymunedol lleol i gefnogi ystod eang o weithgareddau sy’n helpu i drawsnewid cymunedau a gwella bywydau.

Gwyddom nad oes dwy gymuned yr un fath. Nod y Grant Grymuso Cymunedau Lleol yw mynd i’r afael â heriau lleol amrywiol, gan gefnogi grwpiau lleol sydd o fudd i  oedrannau amrywiol.

Bydd pob archfarchnad yn cynnwys 3 phrosiect cymunedol ar-lein sydd wedi’u henwebu gan gwsmeriaid a chydweithwyr. Bydd yr un gyda’r nifer fwyaf o bleidleisiau ar-lein yn derbyn rhodd o £500 gyda’r 2il a’r 3ydd safle yn derbyn £200 yr un.